Anpil nan nou ap fè nwit blanch
N ap bat night, se pa pou n etidye, ni pou n travay,
men se kalvè lavi k ap sakaje nwit nou
Li fè n rete je kale, ap gade plafon kay nou
Pandan n ap espere yon solisyon k ap sòti nan obsèvasyon nou, petèt.
Anpil nan nou ap fè nwit blanch…
Se pa pou plezi, men paske lespri nou ap vwayaje
ap chèche orijin traka nou yo
N ap mande konbyen tan ankò pou n tann jiskaske solèy la deside leve sou lavi nou.
Anpil nan nou ap fè nwit blanch…
Pa paske se sa nou vle
Men paske n ap chèche repons nan silans nwit lan.
N ap chèche lapè ke somèy pa ka ban nou
Paske lè n fèmen je nou,
kochma konn pran plas rèv nou.
Anpil nan nou ap fè nwit blanch…
Paske tout sezon yo sanble lajounen
Epi nou toujou espere l ap diferan lannwit
N ap konte chak minit, chak segond
Nou santi tan an long, twò long!
Anpil nan nou ap fè nwit blanch…
Paske nou swaf wè tan pa nou rive
Nou bezwen wè yon lòt sezon
Nou bezwen wè kè nou kontan
Pou jou yo pran lòt koulè ke koulè sonb sèlman.
Anpil nan nou ap fè nwit blanch…
Paske n ap tann lakansyèl lavi nou parèt
Paske se nan mitan lannwit sèlman nou ka pran yon ti souf avan n rekòmanse yon lòt jounen ki plen ak sekous.
Anpil nan nou ap fè nwit blanch…
Men m ap mande m:
Èske n ap dòmi yon jou?
